اصدقائى الأعزاء....تعليقا على امتحان الفيزياء اليوم .

الخميس 14/7/2022

🌹اولا : الواد بتاع التويوتا اللى سرب الامتحان لازم يقولنا هو مين وابن مين ...والأهم موديل العربية سنة كام ؟؟ 

يا بختك يا عم يا باشا يا ابن الباشا يا مسنود بقيت تريند وهيجيبوك وهتتظبط ولو ده محصلش انا ممكن يجرى لى حاجة وافقد الثقة فى كل شيء فى البلد...

🌹ثانيا : وده الاهم ...توقعات سمية الخشاب مجتش فى الامتحان محدش ياخد عندها درس تانى يا جماعة. 

🌹ثالثا :  نتكلم جد شوية بقى 

👍 الامتحان فنيا كويس ويحفظ هيبة المادة  ومن حق واضع الامتحان يقيس الفروق الفردية ومحدش يقدر يتكلم فى دى ... واعتقد نسبة التلتين 2/3 فى مستوى الطالب المتوسط وفوق المتوسط و1/3 الاسئلة فى مستوى الطالب المتميز والعبقرى ومش نقطتين تلاتة ذى بعض الزملاء ما بيقولوا [ 20 سؤال تقريبا ] يعنى معظم الدرجات هتقع بين ال 40 و ال 50 وقليل من الطلاب اللى هيطلع فوق ال 55 الا لو كان بيزاكر صح من اول السنة 

👍والأسئلة جديدة ومبتكرة مثل العام الماضى بس أصعب شوية .يعنى الطالب اللى استرشد بامتحانات الوزارة العام الماضى دور اول وتانى وتجريبى  هيطلع كسبان كتير واللى جرى ورا توقعات وافتكاسات ال 1000 سؤال و ال 2000 فكرة والمنصات والهرى  ده اهدر وقت وجهد فى الأرض 

٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

👎فى اسئلة صياغتها ذى الزفت وغير واضحة 

👎الوقت غير كافى واشتكينا نفس الشكوى دى السنة اللى فاتت ولا حياة لمن تنادي 

👎 اسئلة الحديثة  صعبة جداا 

👎فى افكار تم تكرارها بدون داعى وكان من الممكن الاكتفاء بفقرة واحدة على الجزئية دى 

👎الامتحان اتسرب  وده كلنا هنشيل فيه المسئولية شعب وحكومة 

👎 لازم الوزارة بنفسها تقدم مصدر رسمى و محتوى كافى  من الأسئلة للتدريب  فى منصة واحدة مش مليون منصة وتوجه الطلاب من اول يوم فى السنة للتدريب عليها  لان حرام عليكم الطلاب تحل ...

❌️3 كتب خارجية ❌️ منصة نجوى ❌️حصص مصر ❌️ بنك المعرفة ❌️ جريدة الجمهورية ❌️مراجعات ليالى الامتحان لملازم المدرسين  .... وكل ده يخلى الطالب يشتغل 10 : 15 سؤال فقط من ال 50 حرام عليكم بجد الولاد تعبوا 

🌹رابعا  :  اصدقائى الطلاب دفعة 2022(hard luck) 

 رجاءا متحاولش تراجع اى اجابات وامسك المادة اللى بعدها بس اسمح لى مش من حقك تفتح بقك وتنتقد وتقول الامتحان صعب او سهل إلا لو انت محترم وبتزاكر من اول يوم وتكون عملت اللى عليك بجد  وشوف الاسكرين شوت زمايلك طالعين من اللجنة بيقولوا ايه 💯💯 

🌹 خامسا :  اصدقائى دفعة العام القادم 2023 ...يارب تكونوا استوعبتوا الدرس كويس والمذاكرة تبقى من اولى ثانوى مش اخر شهرين فى سنة تالتة ... للى ناويين يدخلوا علمى ...الموضوع كبير 

وياريت السادة اولياء الامور اللى بيقولوا بنبدأ بدرى دروس ليه ياريت  يرحمونا ويشوفوا مستوى امتحانات المادة عندنا وقد ايه بنتعب عشان نوصل بالطالب لمستوى الفهم ...ابقوا قولوا بعد كده كل المواد تبدأ براحتها (( الا الفيزياء ))

🌹 سادسا : السادة الزملاء ....كفاية توسع فى المنهج ونلعب على الفهم المبنى على الشرح بطريقة جيدة مش المبنى على كثرة الحل من بكابورت اسئلة يطفح فى وش الطالب بالكام الف سؤال وفى الاخر مش بييجوا فى الامتحان . 

الدنيا اتغيرت يا ناااااااااس وعلي الجميع مواكبة التغير وإلقاء المصادر الحالية والملازم فى أقرب سلة مهملات واتباع طرق جديدة فى الشرح ومصادر جديدة فى التدريب  وننتظر ان تقوم الوزارة بدورها فى القريب العاجل 

شكرا لكم ....Mr/ Ramadan Fathi

طول عمري بقول نلتزم بالمنهج فقط 

المنهج مفهوش حاجة اسمها سرعة انسيابية ولا انسياقية ولا كثافة تيار ولا الفزلكة الفارغة دي 

دا فراغ فزياوي

واي حد بيشرح أو يحل حاجات من دي للطلبة ربنا هيحاسبه

للمرة المليون حل زي ما انت عاوز وافكار صعبة وغيره لكن داخل إطار المنهج والمنهج غني بالافكار 

اللهم بلغت اللهم فأشهد

انا لا اقصد أحد بعينه 😉

لان كلنا عارفين مين بيعمل كدا 😂

محمد الباسل صاحب كتاب خارجى

Mahmoud Mohamed Hamad

  تحليل امتحان الفيزياء 2022  الامتحان  ٣٤ سؤال كهربية + ١٦ سؤال حديثة  ⬅️ الفصل الأول 7 اسئلة ٢ سهلين و٥ في المستوى المتوسط ⬅️ الفصل الثاني 10 اسئلة  منهم سؤال سهل و٣ أسئلة في المستوى المتوسط و٤ يزيدوا عن المستوي المتوسط لطول الحسابات وسؤالين صعبين لطالب مميز ⬅️ الفصل الثالث 10 اسئلة  سؤالين سهلين و٦ أسئلة متوسطة وسؤالين صعبين ⬅️ الفصل الرابع 10 اسئلة  كل ال ٧ أسئلة سهلة على غير العادة ⬅️ الفصل الخامس 7 اسئلة   سؤالين سهلين و٥ أسئلة في المستوى المتوسط ⬅️ الفصل السادس 3 اسئلة  منهم سؤالين سهلين وسؤال في المستوى المتوسط ⬅️ الفصل السابع 3 اسئلة كلهم سهلين ⬅️ الفصل الثامن 4 اسئلة منهم ٢ سهلين و٢ في المستوي المتوسط. إجمالا": ٢١ سؤال سهل( لا يحتاج الي حسابات مطولة) ٢٥ سؤال متوسط ( قد يحتاج لحسابات مطولة شئ ما او خادع في اللعب بلفظ) ٤ أسئلة صعبة للطالب المميز( تحتاج تفكير بعمق)  لذا برأيي إن الامتحان موزون من المستوي الفني ما هو مش طبيعي إن كل الناس تجيب الدرجة النهائية ونرجع نشتكي إن في كليات بتاخد من ١٠٠% أما المأخذ الوحيد على الامتحان إن الوقت لا يكفي لاعطاء كل سؤال حقه  ١٨٠ دقيقة على ٥٠ سؤال يعني ٣.٦ دقيقة لكل سؤال لا تكفي لقراءة السؤال بإتقان واستدعاء المعلومات من الذهن والتطبيق والحساب والمراجعة ناهيك عن مدي الاجهاد الذهني الذي قد يتسبب في حالات اغماء، ٥٠ مسئلة بدون فاصل مجهدة جدا حتي على المدرسين    اه .... حاجة كمان لازم اقولها احقاقا للحق  .... إن واضع الامتحان تمكن من القضاء على موروث قديم لدى بعض الطلبة والمدرسين المبتدئين ان الأسئلة بتيجي بالنص من كتب خارجية بعينها  وقضى على فكرة إن حد يضحك على طالب ويقوله الامتحان لن يخرج عن العشر ورقات دول جاء الامتحان ليؤكد كلمتي المشهورة "انت داخل الامتحان تفكر مش تفتكر" انت ادربت كتير علشان تعرف تفكر وتحل مشكلة جديدة مش تسمع حاجة حافظها!!!! فخور جداااااا باولادي ❤❤ منهم اللي زعلان شوية علشان بس ملحقش يقفل الامتحان ومنهم اللي ربنا كرمه وقفل بس داري على شمعتك تقيد دول مش بتوع صياح على الفيس بوك ومنهم اللي اجتهد وبذل أقصى ما في وسعه واكيد ربنا هيجبر  بخاطره ويراضيه ويبقى في أعلى المناصب حتى لو جايب ٣٠ المهم انه عمل اللي عليه واجتهد في 👨‍🎓👩‍🎓 امتحان فيزياء ٢٠٢٢ بعنوان الفيزيا للكبار بس  متنساش تمشي بمبدأ حل بإيدك عشان محدش هيفيدك 💪......