كيف يكون مصروفها 1200 جنيه شهريا وبتكفى مصاريف الشهر وبيفيض منها 200 بتحوشهم للمصيف ٢٥/٩/٢٠٢١ السبت الطريقة من هنا
ميزانية بال١٠٠٠ج فى الشهر
انا الحمد لله باخد ١٢٠٠ج مصروف شهر ى وبفضل الله ربنا بيبارك وبحوش منهم ٢٠٠ج ممكن افسح الاولاد بيهم او نشترى حاجة ناقصة او العاب او اشترى ميكب بس او نصرفهم فى لبس اى حاجة نروح بيها عن نفسنا يعنى هو خلاص
قال تعالى ((ومن توكل على الله فهو حسبه ان الله بالغ أمره ))
اول حاجة انا بجيب ب٣٠٠ج فراخ حوالى ٦ فرخات أوزان كبيرة عشان اعرف اقسمهم لكذا يوم .
١. بقطع الفرخة وركين وصدرين والاجنحة لوحدها والرقبة لوحدها والرجول لوحدها
ال٦ فراخ بيعملوا معايا ١٢ ورك و١٢ صدر و١٢ جناح و١٢ كبد وقوانص و٦رقبات و١٢رجل فرخة
اول حاجة ركزى الله يباركلك الأوراك بقسمها ٢ رمانة ونصف ورك والصدور بخليها من العظم تمام
وبجيب اطباق فل وبقسمهم كالاتى عشان ناكل فراخ ولحمة طول الشهر ان شاء الله ونطبخ اللى نفسنا فيه احنا واولادنا وربنا يبارك
(١)🥰 بحط فيه ٤ رمانات ( دبوس الفرخة ) وبسلقه واعمل معاه رز وطبيخ وبعدين اعمله فى الفيجتار.واحمره.
(٢)🤩 بردوا زيه
(٣)😋بحط فيه ٤نصف الورك كبيرة طبعا وبسلقهم واحطهم تحت الشواية وحتة فحمة واعمل معاه محشى وشوربة لسان عصفور
(٤)🤗 ٤نصف الورك بسلقهم واعمل أرز بشعرية وشوربة خضار .
(٥)🐦 وركين بخليهم وبعملهم حمام كداب وبيكونوا كبار جدا ووقت التقديم بقسم كل ورك اتنين
(٦)😍 وركين فراخ ممكن اشويهم وبعملهم مع كشرى وكل اتنين ورك وطبعا الأوراك كبيرة وانا معايا طفلين وكدا كدا بيتفضل منهم فالطريقة دى احسن طبعا.
وكدا الأوراك خلصت🍗🍗🍗🍗🍗🍗🍗🍗🍗🍗🍗🥰🥰🥰🥰🥰🥰
الصدور 🌮🥪🍕🍖🍝
(٧)😍 بجيب صدرين فراخ وبعملهم بانية وبيعملوا معايا حوالى ١٠ شرايح ودا كويس جدا بعمله مع كيس مكرونة متحمرة ومعاها مخلل او سلطة
(٨)🥣 صدر فرخة وبقطع الفراخ شرايح طوليه وبعملها استربس وبردوا على الفريزر وبيعملوا معايا كمية حلوة مع مكرونة اسبجتى بالصلصة.
(٩)😋بقطع صدر فرخة قطع صغيرة وده بعمله شاورما او فى كريب وبيكون تحفة جدا وتقدميه مع الكاتشب والسلطة والمخلل
(١٠)صدرين فراخ وبقطعه قطع مكعبات حلوة كدا ودى بعملها شيش طاووق مع أرز بسمتى وحتةفحمة وسلطة وعيشى حياتك
(١١)😍 صدرين فرخة وبقسم كل صدر بالطول اتنين فقط يبقى الصدرين عملوا ٤ قطع وبتبلهم ببصلة وتوابل فراخ نصف معلقة ص ملح ومعلقة زبادى ومعلقة زيت واسيبهم فى الثلاجة ٥ساعات عشان يشرب التتبيلة وبعدين اشوحها فى معلقتين زيت واسيبها تستوى على نار هادية وياحلاوتها ياطعامتها وكمان تشمميها ريحة الفحم تحفة وبعمل جنبها بيتزا وكاتشب ولو حابة سلطة او مخلل مفيش مانع وممكن ٢بطاطس مقلية شرايح
(١٢)🤩 صدرين فراخ بقسمهم بالطول بردوا واسلقهم واعمل معاهم أرز وطبيخ(خضار)ولسان عصفور وبعدين اجيب الصدور واحط عليهم صلصة وبصلة صغيرة مبشورة وفص ثوم مفروم ناعم وتوابل فراخ وادهن الصدور وتحت الشواية ياخدوا لون حلو كدا وتقديمهم مع الاكل
(١٣)😍آخر صدرين وبعملهم بانية واقطعهم شرايح متوسطة وبيعملوا حوالى ٨ شرايح واجيب الشاكوش بتاع البانية واضربهم لحد ما كل واحدة تبقى كبيرة جدا وبعدين بجيب دقيق واحط كل واحدة فى الدقيق وبعدين كوباية مياة مثلجة فيها معلقة صغيرة ملح ومعلقة ص توابل فراخ وحطى الصدر اللى حطيته فى الدقيق فى المياة الساقعة ودى احسن من البيض مليون مرة اولا مش هتفك بعد ما تقليها فى الزيت ثانيا هتكون مقرمشة من برة ومستوية من جوا ولونها دهبى وجميل وبعدين طلعيها من المياة وعلى الفيجتار وبعدين رصيها فى طبق فل كبير وخلصى الكمية وعلى الفريزر وطلعيها وقت الحاجة.
وبقدمها مع المكرونة الصغيرة المتحمرة بصلصة
(١٤)🥗طبق كبدة بعمله بعمله ببصل وطماطم وتوابل فراخ مع أرز بالخلطة وسلطة ومخلل.
( ١٥)🥟طبق قوانص وبقطعه شرايح وبشوحه بفص ثوم وفلفل اخضر وتوابل فراخ وعيش فينو وشرايح طماطم
(١٦ )🍚١٢جناح فراخ بعمله بصوص الباربيكيو وأرز ابيض وسلطة
(١٧)١٢جناح فراخ بنفس الطريقة مع كشرى وصلصة حارة
(١٨)رقب الفراخ بسلقه واعمل معاه محشى ورق عنب لان الشوربة بتاعته بتكون دسمة جدا مع لسان عصفور
(١٩)رجول الفراخ انا بحبها وخصوصا الملظلظة بتاعت الفراخ الكبيرة وانتى حرة تستخدميها او لا
(٢٠)بيض مسلوق وسلطة وجبنة بطماطم وبطاطس مقلية وطبق بيض مقلى.
😋😋😋😋ثانيا اللحوم 🥩🥩🥩🥩🥩🥩🥩🥩🥩
بجيب لحوم ب٣٠٠ج ٢كيلو من ابو ٩٠ ج🥩🥩 وكيلو صغير من ابو ١٢٠ ج🥓 وبعملهم ١٠ وجبات من ضمن الشهر .
نكمل الأطباق١٤🥰
( ٢١) 😋الكيلو اللى ب١٢٠ بقسمه نصفين النصف الأول بقطعه٤ قطع واخليه للسلق مع محشى وملوخية.
(٢٢)🥧النصف التانى بقطعه ١٥ قطعة مربعة وده بعمل بيه كباب حلة مع طاجن كبير بطاطس وطاجن أرز معمر فى الفرن واشممه حتة فحمة وانسى نفسك. وسلطة .
(٢٣)☺️ الاتنين كيلو بقسمهم ٨ وجبات بفرمه كيلو ونصف بس الأول وبيكون فيه حته قص على حوالى ٢٠٠ جرام دهن كله بيتفرم واحط كل ربع ك لوحده فى طبق فل
(٢٤)🍔🍔🍔الربع ك الأول بجيب ٤معالق كبار فول صويا وانقعهم فى كوباية مياة سخنة وبعد ما تشربها تصفيها وتضيفيها للحمة المفرومة وبصلة مبشورة وبقية مكونات الهامبورجر وتخلط جيدا وتوابل الهامبورجر بردوا بعملها انا فى البيت واحلى من الجاهز واوفر جدا وبعد ين اجيب غطا البرطمان واحط كيس نايلون ورشة زيت واقرص الهامبورجر واخلص الكمية وبتعمل معايا ٨ قطع وبحط بين كل واحدة هامبورجر ورق زبدة او كيس بلاستيك من الابيض الشفاف واقصه مربعات وفاصل بين كل واحدة والتانية وعلى الفريزر وبطلعه على صينية سخنة فيها معلقتين زيت او صينية الشوى أو تيفال وهاتى ب٥ ج كيزر وحطى شرايح طماطم وخيار وفلفل وخس وقدميه مع الكاتشب والمخلل و٢بطاطس مقلية بس
(٢٥)🌭🌭🌭 ربع مفروم على ٥معالق كبيرة برغل والبرغل حطيه فى مياة قبل ما تستخدميه وبصلة متوسطة مبشورة ومتصفى مياته كويس جدا عشان ما تفكش معاكى وتوابل الكفتة العريانة وفص توم قرن فلفل أخضر بارد عشان الاطفال وبعدين احط ايدى فى مياة البصل واصبع الكفتة على الاسياخ الخشب واحطها فى الفريزر واطلعها واعمل
معاها سلطة طحينة وسلطة وكاتشب وعيش بلدى كل رغيف فيه صوابعين مع شرائح رفيعة طماطم و خيار والكمية عملت معايا ١٥صوابع حلوين جدا كل واحد رغيفين حلوين جدا وحطى معلقة سلطة طحينة فى كل وجبة
(٢٦)🥰 ربع مفروم مع بصلتين كبار مفرومين ناعم جدا وعصير طماطم وقرن فلفل أخضر وبعصجه وبعمل بيه صينية مكرونة بشاميل
(٢٧)🥮 ربع مفروم ونفس الطريقة وبعمل بيه لازانيا .
(٢٨)🌯 ربع مفروم وبعمل كفتة أرز فى الكبة عندى فى البيت. وبيعمل معايا نصف كيلو وبقليهم واعمل نصفهم بصلصة مع أرز ابيض وسلطة والنصف التانى بحطه مقلى كدا عشان فيه بيحبه بصلصة وفيه بيحبه مقلى ومفرش
(٢٩) 😋ربع مفروم وبعمل بيه حواوشى وبضيف ليه مع الخلطة بتاعته وتوابل الحواوشى ٤معالق فول صويا ولازم تنقعيها الأول وتصفيها قبل ما تضيفيها بهارات الحواوشى بتخليها نار وتحفة جدا واحلى من برة مليون مرة بيعمل ٨ ارغفة بس مع سلطة ومخلل
(٣٠)🥰 ربع مفروم وبعصجه عادى واعمل ٢ طاجن كبار بكيس مكرونة فى الفرن وسلطة ومخلل .
(٣١)😘والجوية دى بدل رجول الفراخ إلى مش بيحبها زى ولادى ربع مفروم وبعصجه وممكن اعمل بيها ٤ بيتزا واحطه على وش البيتزا او مع مكرونة اسبجتى وسلطة
او صينية جلاش باللحمة المفرومة او صينية رقاق طرى.
(٣٢)😘والوجبة دى بدل رقب الفراخ وممكن تعمليه مع ورق العنب بيكون تحفة جدا يتفضل معايا نصف كيلو لحمة بقطعه شرايح واعمل بربع ك شاورما وطبعا المكونات والتوابل بتاعت الشاورما وبعمل عيش شامى .وطحينة وسلطة ومخلل وكاتشب وبطاطس شييسى او بحطه تحت ورق العنب يستوى وبيكون تحفة جدا . والربع كيلو اللى فاضل بشوحه ببصلة واعمل بيه كريب باللحمة مع جبنة موتزاريلا وزيتون شرايح وخيار وطماطم وبصلة صغيرة شرايح ومايونيز وكاتشب ومخلل او بعمله بوفتيك واضربه بالشاكوش لحد ما تكبر معايا واتبلها واغلفها بدقيق وبيض وفيجتار .
كدا اللحوم خلصت وفاضل من ١٠٠٠ جنيه ٤٠٠جنيه
١٠٠ج بجيب بيها شيكارة أرز ٥ ك ب ٣٥ ج وبجيب ١٠ كيس مكرونة الملكة ب٤٥ج بجيب ٢مكرونة اسباجتى و١بشاميل و١لازنيا و١لسان عصفور و١شعرية و٢مكرونة صغيرة و٢مكرونة معووجة كدا .
وبجيب ب٥جنيه عدس بنى عشان يوم كشرى وبيعمل مرتين كشرى وب١٥ ج توابل ٥انواع كل نوع لوحده وبجيبه مصحح واحمصه فى البيت واطحنه عندى واشكل براحتى وكل شهر بيتفضل عندك نوع او اتنين وساعات لما يكون معايا فكه بجيب ١٥ نوع واعمل بهارات الفراخ لوحدها واللحمة لوحدها والشاورما لوحدها والكفتة لوحدها والحواوشى لوحده والهامبورجر لوحده واوفر وانظف وفى الاكل هتغير طعم الاكل معاكى ولو محتاجين طريقة مل حاجة اكتبوا فى التعليقات انزلها ليكم.
و٥٠ ج بجيب بيها حاجات الصابون زى ما نزلتكم فى البوست .٥ اوكسى ب١٥ج و٣ج كلور حوالى ليتر و١٥ ج اكياس فانش بودرة يتفضل معايا ١٧ ج بجيب بيهم اكياس شامبو 😂واللى داخل ياخد شاور ياخد كيس واحد معاه بيوفر وانظف طبعا وبيقعدوا كتيير عن زجاجة الشامبو والداونى والصابون السايل والريحة وصن لايت والشاور بعملهم انا بعملهم فى البيت وبيوفروا عليا وبكسب كمان الحمد لله من وراهم.ما عدا الصابون بريحة مش بعرف ابيعه محتاج قوالب وتغليف وموال.
فاضل معايا ٢٥٠ ج باخد ٥٠ ج واجيب ٥علب جبنة الواحدة ب٣ج يبقى ١٥ج عشان الفطار ونصف كيلو عسل اسود عشان الانيميا ب٨ج وربع طحينة ب١٢ ج وبجيب ب٥ج ملح
والتموين بجيب بيه زيت وسكر بس حوالى ٤ زجاجة زيت والباقى سكر .
باقى معايا ٢٠٠ج وبجيب كرتونة بيض وبصرف كل اسبوع ٥٠ ج يعنى ٢٠٠ج الاربع اسابيع عشان الفاكهة والخضار اهم حاجة الطماطم لا غنى عنها بجيب ب١٠ ج غاليه او رخيصة هيا ال١٠ ج وكيس صلصة ب١ لما تكون غالية وبشوف الخضار إللى سعره حلو وبجيب نصف كيلو بس عشان ما يبوظش عندى لان الخضار ساعات بيبوظ ومنى انوع فى الاكل والفاكهة ٢٥ج بجيب نوع واحد كل اسبوع وكل اسبوع بجيب نوع مختلف عن الاسبوع اللى قبله .
ومش لازم تجيبى كل حاجة فى شهر واحد ممكن كل شهر نوع مختلف انا ساعات بجيب ب١٨٠لحمة٢كيلو و٢٠٠جنيه ٤فراخ أوزان كبيرة و١٠٠كبدة جاموس و١٠٠سمك بس ولادى مش بيحبوا السمك وبيغضبوا فبقيت اجيب ب١٠٠ دى اما فراخ او لحمة او كوارع وممبار .
وساعات اجيب ب٥٠ ج ٢ك دقيق و٢كيس بيكنج باودر وفانيليا وخميرة وكيس بسبوسة وكيلو كنافة ولبن
انتى نوعى حسب احتياجك .
انا عندى من الشهر اللى فات دقيق وبحطه فى الدرج اللى تحت الفريزر وكاكاو وفارمسيل بنى وابيض وكاكاو خام عشان كان عيد ميلادنا الشهر اللى فات .
وكل شهر بيتفضل عندك حاجة من الشهر اللى قبله ان شاء الله
والكاتشب انا بجيب ب١٠ ج اكياس الصغيرة اللى الواحد بربع جنيه اوفر وبتعرفى تتحكمى فى الكمية كل واحد كيس او اتنين حسب الاكلة اللى عاملاها.
واللى شايف ان فيه حاجة قليلة او فيه حاجة كتييرة
هو يظبط حسب احتياجه هو مش احتياجى انا
كل واحدة حرة فى تنظيم اكلها انا عن نفسى بجيب ورقة وقلم واكتب احتياجى الشهر ده ايه وكل شهر بيختلف عن التانى واللى شايف ان الفاكهة والخضار قليلة انا بجيب اللى مستعمله بس اهم حاجة عندى البروتين والسلطة يكون كل يوم والنشويات بعمل كيس المكرونة والأرز اما بعمل كوبيتين أرز او كوباية ونصف أرز ونصف شعرية وطبعا فيه شوربة ساعات كتيير ودا احسن من مكعبات مرقة الدجاج اللى مش عارفة جاية منين ولا نظامها ايه
تعليقات: 0
إرسال تعليق