لو انت ولي امر طالب/ة داخل الصف الاول الثانوى هذا الكلام يهمك تجربة ولى

 تجربتى ك ولى أمر لطالبه خاضت تجربة الصف الأول الثانوى العام قبل الماضى ٢٠١٩ و ما أقترحه على حضراتكم و أنصح به :   بداية ... ألف مبروك لكل أبنائى و بناتى و أولياء أمورهم الناجحين فى الشهاده الإعداديه و المتطلعين لدخول الصف الأول الثانوى  كلامى هيكون موجه أكتر لأولياء الأمور بحكم أنهم أصحاب خبره أكثر من أبنائنا الطلاب...  أوعى حضرتك تقول أنا إبنى خايف يدخل ثانوى عام من اللى سمعناه العام الماضى  صحيح إحنا كأولياء أمور و طلبه عانينا الأمرين طول العام الماضى و حتى من قبل بدء الدراسه من كميه المعلومات المرتبطه بالنظام الجديد و التى كانت فى كثير من الأحيان لا تزيد على كونها شائعات لا أصل لها...  المهم دخل إبنك ثانوى عام طالما مجموعه يسمح بذلك و طالما هو كطالب و أنتم كأولياء أمور راغبين في ذلك...  اللهم إلا كان لأحد منكم توجه آخر فى دخول ثانوى صناعى أو ما شابه فهذا محض رغبتكم بالطبع...  أما عن نصيحتى لحضراتكم مع نبذه مختصره للصف الأول الثانوي بشكله الجديد متضمنا المنهج .... فهى كالتالى :  حضرتك كنت بتدرس فى الإعدادى خمس مواد  و طبعا كنت حاسس إنك عامل مجهود كبير...  ده كلام جميل جدا طبعا  لكن خد بالك... أولى ثانوى هيكون عندك ١٠ مواد دراسيه  يعنى ضعف عدد المواد اللى كانت عندك السنه اللي فاتت ...  و طبعا هيكون عندك نفس الوقت بل ربما أقل ....  ده معناه انك الماده اللى كنت بتذاكرها فى ساعه مثلا... لازم تعود نفسك إنك تذاكرها فى نص ساعه  و دى حاجه محتاجه تدريب  و كمان لازم تغير من طريقة مذاكرتك و إلا مش هتلحق تخلص حاجه و هتفضل طول الوقت مهموم و مراكم دروس عليك كتير  نعمل إيه يعنى... ؟  لابد من تغيير طريقة المذاكره و الإسراع فى المذاكره ذاتها  الشرح ياخد منك وقت مش كتير و مباشره روح طبق على الاسئله و المسائل علشان تختبر نفسك فى فهم اللى ذاكرته.... و هكذا ...  طب بالنسبه للمواد نفسها..  بص حضرتك...  هيكون عندك ٣ أفرع رئيسيه....  عندك مواد علميه فيزياء كيمياء أحياء  عندك مواد أدبيه جغرافيا تاريخ فلسفه  عندك الرياضيات جبر هندسه حساب مثلثات  عندك مواد لغات عربى إنجليزي ألمانى أو فرنساوى  اوعى تكون اتخطيت...  إستعن بالله و توكل على الله و إن شاء الله تعالى هتلاقى كل حاجه مظبوطه  النصيحه العامه هنا :  بالنسبه للمواد العلميه...  طبعا بيكون فيها جزء نظرى و جزء خاص بالمسائل معظم الطلبه بتغلط غلطه كبيره جدا بيكونوا خايفين مثلا من الفيزياء فبيهتموا جدا بالمسائل على حساب النظرى طبعا كده غلط حضرتك لازم تذاكر ده و تدرب على ده و ما تجورش على حاجه لحساب حاجه تانيه  بالنسبه للرياضيات...  طبعا كلها مسائل فى أفرعها الثلاثه  و بالنسبه للغات...  بص يا سيدى  لغاية السنه قبل اللى فاتت كان كلام و السنه اللي فاتت كلام تانى خالص علشان موضوع النظام الجديد....  نتيجه تطبيق النظام الجديد فى اللغه العربيه مثلا اصبح الامتحان بيجى لحضرتك من خارج الكتاب المدرسي بمعنى انت بتدرس نصوص دى علشان تفهمها و توسع بيها مدارك حضرتك لكن الامتحان هيجيلك نص ما شوفتوش قبل كده من خارج المنهج يعنى و عليك إنك تفهمه و تحله طبعا  كذلك بالنسبه للبلاغه  و لا تنسي أن عندك شعر جاهلى..  ربما يصعب على البعض فهمه من أول مره  طبعا النحو انت متعود ان بيجيلك قطعه مختلفه عما درست  القراءه كمان اللى فى كتاب الوزاره بتكون للفهم لكن الامتحان بيكون قراءه متحرره يعنى من بره الكتاب المدرسي  هقترح على حضرتك إقتراح مجنون حبتين لكن ما باليد حيله  لازم نواجه كلنا هذا الأمر الجديد  و إحمد ربنا ١٠٠٠ مره إن فى حد بيحكيلك اللى حصل العام الماضى و بيقولك تجربته  إحنا دخلنا من غير أى توجيه و لا نصيحه و لا إرشاد  النصيحه المجنونه الخاصه باللغه العربيه  حضرتك تقدر تنزل من على النت أو تجيب كتب العربى للصف الأول و الثانى و الثالث الثانوى و تحاول تقرأ مع نفسك كل مواضيع القراءه و تفهمها  و كذلك النصوص و تفهمها  انا بقول تقرأ القراءه و النصوص و تفهمها  مش بقول تحل حاجه و لا انك تقرأ و تذاكر بلاغه  لا ابدا...  ده هيجى وقت الدراسه إن شاء الله  لكن انا محتاج منك إنك تطلع نفسك من قالب إعدادى و تزود حصيلتك اللغويه فى العربى عن طريق قراءه الصفوف الدراسيه الثلاثه الخاصه بالمرحلة الثانوية قراءه و نصوص و شعر.....  اللى شايف إن الاقتراح ده ممكن يفيده أرجوه يبدأ من شهر أغسطس هيفرق مع حضرتك كتير جدا  و اللى شايف انه كلام فارغ.. إعتبرنى لم أقترح عليك حاجه....  خد بالك :  إعرف و إفتكر كويس أنك تحولت من تلميذ ل طالب و شتان ما بينهما  تلميذ ... يعنى كنت بتستنى حد يشرحلك و يتابعك و يحل معاك و يراجعلك طالب ... يعنى أنت حضرتك اللى لازم تسعى لطلب العلم و تحصيله و تحاول و تجتهد قدر إستطاعتك فى المذاكرة و الحل و هكذا..  ما تستناش حد يجي يدلعك زى زمان .....  نيجي للإنجليزى و الألمانى أو الفرنساوى  ببساطه شديده جدا.... أنت محتاج تكون متأسس فيهم كويس جدا جدا و عندك حصيلة كلمات وهميه  ده ممكن يجي انك تقرأ قصص إنجليزي و تفتكر كل الكلمات دى كويس علشان هتحتاجها فى الترجمه و ال pragraph  أما عن المواد الأدبيه....  ذاكرها كويس و حل عليها كتييير....  تعالوا بينا بأه نتكلم شويه عن النظام الجديد......  هو احنا كل ده لسه ماحكيناش عنه..  ايوه يا عم الحاج... اللى فات ده كان كلام عام عن مناهج الصف الأول الثانوى  بس لسه ما قولتلكش حاجه عن النظام الجديد  معلش استحمل شويه علشان تعرف انت داخل على إيه ...  بص يا سيدى....  علشان ما تزهقش منى حضرتك أكتر ما أنت زهقان هقولك المختصر المفيد عن النظام الجديد....  ببساطه حضرتك كنت بتذاكر الدرس فى أى ماده و تروح الامتحان تلاقى الاسئله شبيه باللى ذاكرته  دلوقتى اصبح الموضوع مختلف ... الامتحان هيكون على حاجه بيقولوا عليها قياس نواتج التعلم  يعنى ... هيسأل حضرتك على اللى فهمته و اللى المفروض تستنتجه من فهمك ده على كل ماده  ربما الكلام ده اصلا مش جديد على المواد العلميه و الرياضيات  لكن جديد جدا على اللغات و المواد الأدبيه  طبعا ده وجهة نظري و تجربتى  و من كان له رأى آخر فإختلاف الرأى لا يفسد للود قضية  المهم علاج الموضوع ده زى ما قلت لحضرتك الحل بالنسبه للغه العربيه انك تحاول تنمى حصيلة ثقافتك اللغويه و المعرفيه بقراءة الصفوف الدراسيه الثلاثه الخاصه بالمرحله الثانويه  و الانجليزى برده زى ما قولتلك حاول تزود حصيلة مهارات معرفتك بالكلمات على اقصى قدر استطاعتك و اذا ممكن تقرأ قصص إنجليزي فبها و نعم  هنا فى حته مهمه جدا تشمل اللى فات و تشمل نصيحتى للمواد الأدبيه  زمايل حضرتك اللى خاضوا تجربة أولى ثانوى ما كانش عندهم فرصه لأى تدريب حقيقي يشوفوا فيه إزاى ممكن الامتحان يجيلهم  حضرتك دلوقتى عندك حوالى ٢٥ إمتحان لكل ماده من الوزاره و هى محصلة تجربة يناير و مارس و مايو ٢٠١٩  اعتقد ده دور الكتب الخارجيه إنهم هيحصلوا على هذه الامتحانات و هتكون متوفره بين أيديكم و طبعا كمان اكيد مؤلفى الكتب الخارجيه هيبدأوا يعملوا نماذج على نفس النمط الجديد  طبعا دى حاجه جميله لحضرتك....  يبقى المطلوب انك تذاكر و تذاكر كمان بشكل جديد و مختلف عن اللى اتعودت عليه قبل كده فى ابتدائى و اعدادى علشان عنصر الوقت و تطير على الاسئله تحلها كلها...  ايوه كلها مش شويه منها و تحل كل مسائل الفيزياء و الكيمياء و الرياضيات بكل فروعها و تهتم بالجزء النظرى اللى فيهم و ان شاء الله ربنا يوفقك و تلاقى وقت لكل ده.....  الكتب الخارجيه التى أنصح بها الإمتحان للكيمياء و الفيزياء و الأحياء الأضواء أو الامتحان للعربي GEM للإنجليزى الامتحان للجغرافيا و التاريخ و الفلسفه  طب الامتحان على التابلت ظروفه ايه ....  هو امتحان زى اى إمتحان  مافيش مشكله إنك تحل على الورق او التابلت  لكن اتمنى طبعا ان الدنيا تظبط على التابلت لان السيستم كان كتير بيقع و القلم كان خطه سئ جدا  بس الوزاره وعدت بحل المشاكل الفنيه الخاصه بالتابلت  لكن تبقى مشكله تعليميه تانيه خاصه بشكل الامتحان ذاته  ان كتير جدا من الاسئله فى كل المواد بتكون اختيارى  حتى فى الرياضيات  يعنى حضرتك بتحل المسأله فى ورقه منفصله و بتاخد الاجابه بتاعتك و تختار الحل على التابلت  طبعا دى عيبها انك يا تاخد الدرجه كامله يا لا قدر الله العكس  عموما ده النظام الأمريكي المسمى  MCQ  Multiple Choice Questions  الله المستعان و الموفق يارب....  ده مختصر النظام الجديد و التابلت....  هنظم مذاكراتنا ازاى... ؟؟  كل واحد عارف قدراته و امكانياته لكن فى نصيحه عامه فى النقطه دى.....  خلى الوحده الوقتيه للمذاكره لحضرتك بالأسبوع  يعنى ما يمرش عليك أسبوع إلا و انت مخلص كل اللى درسته فى خلال الاسبوع ده  علشان مافيش حاجه تتراكم عليك...  و طبعا الاحسن يوم بيوم  بس يمكن ما تقدرش تعمل كده خصوصا في التيرم الأول  علشان كده بقولك ذاكر بالإسبوع  و ده ممكن تحسنه حبه حبه بخبرتك فى المذاكره  كمان نقطة مهمه...  حد هيسأل أروح المدرسه و لا لأ ؟  إذا منظومه الغياب الإلكترونى إتفعلت يبقى طبعا لا فرار من إنك هتروح كل يوم  و لو لم تفعل فكل واحد هيشوف إيه اللى ينفعه يروح يستفيد من شرح المدرس و لا لأ....  حاول حضرتك تجمع و تلم نفسك فى الثلاث مواد الغير أساسيه و التى لا تضاف إلى المجموع  الدين الحاسب الآلي التربيه الوطنيه  كل ماده من دول هتلاقى ليهم كام ورقه ممكن يلموا المنهج ليك  آخر نقطه : و دى موجهه بقوه لأولياء الأمور...  حضرتك مش عيب إن إبنك يكون محتاج درس فى ماده أو أكتر...  بس لازم ننظم الموضوع ده كويس جدا...  إزاى؟  بعد اذن حضرتك من دلوقتى هدور على مدرس شاطر جدا لكل ماده حتى لو ابنك مش هيحتاج ياخد فيها درس لأنك رايح بداية مرحله جديده و ما تعرفش أى مدرسين للمرحله دى.... ده هياخد منك وقت لغاية ما تستقر على مدرس ممتاز لكل ماده  بس لازم تكون مستعد بمدرس شاطر لكل ماده ربما يجي قبل الامتحان بكم يوم و يحتاج يروح مراجعه مثلا فتكون مستعد من دلوقتى...  أنا تقريبا كده خلصت كل النقط اللى كنت عاوز اتكلم عليها  آسف طبعا إنى طولت أوى بالشكل ده... لكن لأن التجربه كانت جديده من كل الاتجاهات فحبيت اوصل لحضراتكم الصوره بشكل كامل و تفصيلى  نستعين بالله العلي العظيم و نتوكل على الله و ربنا يوفق الجميع يارب عرض أقل