دفعة 2019 الصف الثالث الثانوي اهم النصائح والملاحظات المهمة في حياتك الثانوية

دفعة 2019 الصف الثالث الثانوي اهم النصائح والملاحظات المهمة في حياتك الثانوية

    دفعة 2019 الصف الثالث الثانوي اهم النصائح والملاحظات المهمة في حياتك الثانوية 


    دفعة2019 اللى رايحة 3 ثانوى اسمعونى شوية بس 💙
    1- ابدء دروسك من شهر 8 متبدأش من قبل كده
    2- تخد في الماده مع مدرس واحد فقط
    3- الدروس الخصوصيه افضل من المراكز
    4- لو هتخد في سناتر يبقي تركز انك تروح بدري وتقعد في الاول وتفصل نفسك عن الي حواليك
    5- متخدش مع المدرس علي اساس اسمه ( عفريت الفيزياء ) ( دبابه الكيمياء ) لما يكون بيدي 6000 طالب اكيد هيطلع من عنده 2 جايبين 99% امر عادي ولا علشان ابن خالتك هيخد عنده - ممكن مدرس مش مشهور اوي بس شاطر وبيراعي ضميره
    6- جرب المدرس 3 حصص علي الاقل وشوف طريقه شرحه مناسبه ليك وبتفهم منه ولا لا مش اقل من كده - لو حسيت انك مش فاهم منه حاجه ومش بيوصلك المعلومه غيره اما مش من اول حصه



    7- الدروس في 3 ثانوي مش زي اعدادي - يعني مش هتلاقي انتا قاعد مع 3 والمدرس بيديك الدرس وعارفك بالاسم لا انتا ممكن تحضر مع 300 طالب تانين فلازم تعمل حسابك انك مش هتكون ( النجم الساطع ) زي ما كان بيحصل قبل كده
    8- ظبط مواعيد دروسك من البدايه علي حسب ايام الاسبوع و مواعيد الدروس وبعضها البعض
    9- تخد في الماده مع مدرس واحد فقط ( تاني ) - هتقولي بتكررها ليها علشان متغلطش غلطه شكري ( واحد صاحبي متعرفوش ) كان بيخد في الماده مع 2 و 3 مدرسين لدرجه انه مكنش بيدخل البيت كان فاكر ان كده شطاره وتثبيت للمعلومات
    10- سنه الثانويه العامه 10 شهور - بتبدء من شهر 8 و بتنتهي في شهر 5 - قسم السنه لكزا مرحله علشان تبقي عارف في كل مرحله هتعمل ايه
    11- بلاش تعلي النار اوي من البدايه علشان الانبوبه متخلصش - بتقول ايه ؟ - زي ما قولتلك كده متبدأش السنه سخن اوي و بتذاكر في ال 24 ساعه 24 ساعه علشان متجيش علي شهر 2 تلاقي نفسك زهقت ومليت وتعبت وتقع مره واحده - خليك ماشي بسرعه متوسطه لا تنام ولا تعلي اوعي بس المهم انك تكون متحفز دايما ومصحصح
    12- خلص مذاكرتك اول بأول - اوعي اوعي اوعي تراكم حاجه عليك - خليك خفيف دايما كده - تيجي من الدرس يا في نفس اليوم او تاني يوم بالكتير تكون مذاكر الي انتا اخدته - اول باول هتلاقي نفسك مرتاح نفسيا دايما ومش مضغوط و مطمن من جواك
    13 - كل شهر ادي لنفس يومين تلاته - تعمل فيهم مراجعه علي الي فات - علشان تفوق نفسك وبالبلدي تلضم الي فات بالي جي علشان متفصلش .
    14- خليك مع ربنا دايما - التزم بصلاتك في مواعيدها - الصلاة هتخليك مطمئن وهادي و مستريح ومش متوتر
    15- رضاء والدك ووالدتك عليك مفعوله السحر - ممكن تبقي الدنيا متشقلبه معاك - بدعوه واحده منهم كل حاجه تستقر وتتظبط - فبقدر الامكان برهم وخليهم راضيين عنك
    16- انتا مش في سجن - يعني جو شيل التلفزيون و قطع الانترنت ده مش هيوصل بيك لحاجه الا انك هتكون مضغوط نفسيا ومخنوق طول الوقت - انتا مش صغير انتا كبير وعندك اراده و هدف - يعني عارف انها سنه مهمه ولازم تدي فيها مجهود اكثر من اي سنه تانيه بس كمان لازم يكون في وقت للترفيه حتي لو محدود بس مطلوب
    17- متقولش انا عاوز اجيب مجموع كزا علشان انا عاوز ادخل كليه كزا - لا كان فيه وخلص - انتا تبص علي ال 99% انا مليش دعوه بالكليه دلوقتي انا ليا دعوه بالكام % وابص لل 99% علشان يوم ما انزل ابقي 97% ابقي 98% اما لو قولت انا عاوز اجيب 97% هجيب 95% وهكذا - فمتركزش في الكليه ركز في المجموع بس
    18- كتر شراء الكتب الخارجيه امر مزعج وبيعملك دوشه وتحس انك مش عارف تفتح ايه ولا ايه ولا ايه - فمتفتكرش ان ديه شطاره هات الي المدرس بتاعك ينصحك بيه فقط وركز فيه مع كتاب المدرسه والنماذج بتاعت الوزاره
    19- الغي كلمه ( توتر ) من قاموسك - لو اتوترت حتي لو كنت طول عمرك من الاوائل هتتكعبل في السنه ديه وهتقع علي وشك - انا مش هقولك زي باقي الناس هيا سنه زي اي سنه - لا هيا سنه فريده وبيتحدد عليها مستقبل - علشان كده عاوزه اهتمام اما هيا مش بعبع - قلقها بيجي من التوتر و المعتقدات الي تربينا عليها من الصغر - اما هيا سنه لو فوقت ليها كويس وصحصحت ليها وقسمت السنه مراحل زي ما قولت هتلاقي نفسك من الاوائل بأذن الله
    20- هات نتيجه حائط وعلقها في غرفتك وكل يوم بيومه تشطب علي اليوم علشان تحس ان لليوم ده قيمه ميعديش كده بالساهل - وتجيب ورق نوت كده تسميه ( الجدول اليومي ) كل يوم اول لما تصحي الصبح بعد لما تصلي وتفطر تكتب فيه انتا يومك هيمشي ازاي وهيبقي فيه ايه - هتروح درس ايه - هتذاكر ايه النهارده - هتروح فين كده
    ✅ واخيرا
    تذكروا ان " لِكُلِّ مُجْتَهِدٍ نَصِيبٌ "

    تقريبا خلاص قربنا نقول وداعآ دفعة 2018 وهنبدأ نركز مع دفعة #3ث 2019 طبعا كلها 20 او 40 يوم وهتبدأوا دروس. 
    اولا كدا اللي يعرف حد رايح #3ث يمنشنله
    تعالي بقا اقولك علي شوية حاجات مهمة لازم تمشي عليهم الفترة الجاية.
    1- مبدئيا اختيارك للمدرسين مهم جدا قبل ما تبدأ ، متمشيش حسب صحابك وأسال على المدرس ألف مرة قبل م تحجز عنده دا هيوفرلك وقت ومجهود بدل م تفضل تتنقل بين المدرسين طول السنة ..
    2- حاول تبعد عن كل صحابك الفشلة أو ال بيضيعو وقت ، من الآخر دور على حد نضيف مش منفسن تصاحبه دا هيساعدك جدا .
    3- خلص أى مشاكل فى حياتك قبل م تبدأ لأن الحاجات دى يتأثر على التركيز وإنتاجك جدا.
    4- كل الناس بتبدأ السنة متحمسة جدا ، غالبا اول درس من كل مادة بتبقى حافظاه أكتر من أغنيه شيرين مشربتش من نيلها xD
    5- عشان تحافظ على تركيزك طول السنة ومتزهقش لازم يوم فى الأسبوع تقابل حد صاحبك بتحبه تخرج خروجة مختلفة ، تفصل عن عالم المذاكرة .. جو انى مش هخرج وهاقعد اذاكر هيتعبك اكتر وأنت مش حاسس .. وشوية وهتلاقيك اتقفلت من المذاكرة لكام يوم كدا..
    6- ياريت تسعى أن يكون بينك وبين مدرسك لينك يعنى أى مشكلة تقابلك ف المادة تروحله ، هو بقاله سنين بيدرسها وعارف كل تفصيلة فيها بلاش تعمل فيلسوف وتجرب لوحدك هتندم.
    7- حضورك للحصه مهم جدا جدآ جدآ ، الدرس ال مش هتحضره هيفضل عملك أزمة طول السنة لحد ليلة الأمتحان .. بلاش تيجى على حساب اى حصه خالص .
    8- حكاية انك تاخد فى مادة واحدة عند مدرسين أو تلاته حكاية فاشلة، بتضر أكتر م بتنفع وبتضيع وقت جدا ، الجزء ال عندك مشكلة فيه خد فيه حصة حصتين عند مدرس تانى وبس ..
    9- موضوع الحسد والذى منه ، حافظ على أذكار الصباح والمساء كويس جدا وميهمكش بعد كدا أنت فى معية الله .. متكلمش كتير عن ال بتعمله لكن اوعى تكذب أو تقول مبذاكرش والجو دا .. وازن بين الاتنين ..
    10- متبخلش على صاحبك بأى معلومة أى ملخص صّوره واديه للكل إفتكر " أن الله فى عون العبد مادام العبد فى عون أخيه "
    ممكن تضيع وقت عشان تفهم حد حاجة بس والله والله ربنا بيكرمك كرم مالوش آخر بعدها ... دا مش كلام ، كل دا جربته وغيرى جربه كتير ,,
    11- أمك وابوك لو محبطين نفض لكلامهم خالص، جو انت مش نافع اسمعه من هنا وخرجه من هناك 😉.. بس اعمل ال عليك كويس اوى وهما غالبا هتلاقيهم بيدعولك ومبيقولوش أى حاجة من الكلام دا ..
    12- أدواتك المنظمة بتقلل كتير من تضيع الوقت ( لأن ممكن تقعد تدور على كشكول مثلا نص ساعة بدون مبالغة )
    13- تغذيتك الكويسة طول السنة واهتمامك بالأكل هتفرق معاك جدا .. فى ناس بتقعد فى السرير اكتر من أسبوع بسبب قلة التغذية وإلخ ,,
    14- نومك لا يقل عن 6ساعات وميزدش عن 8 ، كلنا لما بدأنا كنا بنحس بحماس رهيب ومش هنام غير ساعتين والجو دا .. وبتيجى على دماغك فى الآخر مش هتفهم حاجة طول اليوم .
    15- موضوع المذاكرة مع صحابك ، أى مادة نظرية عربى انجليزى ألمانى حتى الكيمياء وفر وقتك وزاكرها فى البيت ، رياضة وفيزياء ممكن ولازم تحدد انت هتروح تقعد معاه قد ايه بالظبط وهتاخد كمية قد ايه ، و ياريت يكون صاحبك ال هتقابله مش رغاى ..
    16 - متشتريش كتب خارجية كتير لكل مادة يكفى كتاب واحد مع كتاب المدرسة فى الأول وخلى باقى الكتب للمراجعة .
    17- بلاش تقفل الفيس والواتس .. لأ افتحهم عادى بس حدد هتقعد اد ايه بالظبط ولازم تقوم لما الوقت يخلص .. معرفتش تسيطر على نفسك اقفلهم ..😉

    18 - متكسفش تقول لحد مش هخرج عشان ورايا مذاكرة ومعلش اقفل عشان مش فاضى .. خليك بجح شوية

    إرسال تعليق