التعليم في فنلندا مقارنة بالتعليم في مصر

التعليم في فنلندا مقارنة بالتعليم في مصر

فيه بلد شمال أوربا اسمها فنلندا كانت من زمان أوي تبع السويد وانفصلت عنها وبعدين بقت تبع الامبراطورية الروسية واستقلت عنها في بداية القرن اللي فات .. البلد دي انهكتها الحروب الاهلية والعالمية وكانت من افقر دول اوربا .. ولحد الخمسينات كانت معظم اعتمادها عالزراعة في حين بلاد تانية في اوربا وصلت الفضاء وعملت نووي .
*
في بداية الستينات اتفقت كل القوى السياسية في فنلندا ان تقدم البلد دي وازدهارها هيبتدي بالتعليم .. فقاموا مميلين على جارتهم السويد وقالتلهم عايزين نتعلم منك ازاي نعلم عيالنا زي ما انتي قبل كده اتعلمتي من الالمان .. فالسويديين قالولهم أوي أوي .. واتفضلوا اشربوا الشاي وكرموهم اخر كرم .. وكروا لهم اسس التعليم الصحيح من طأطأ لسلاموا عليكم .
*
فنلندا خدت النظام السويدي وطورته لحد ما بقى عندها أفضل نظام تعليمي تربوي في العالم حاليا .. طيب وده بقى عاد عليها بايه ان شاء الله ؟
*
فنلندا دلوقتي وطبقا لاحصائية 2015 لصندوق السلم العالمي .. تعتبر الدولة الاولى في العالم الأكثر استقرارا سياسيا واقتصاديا واجتماعيا .. شوفوه من هنا : https://goo.gl/lVvR7V
والمواطن الفنلندي بيعيش حياته بالطول والعرض كأرقى ما يكون عليه البني آدم .. ( على فكرة الياباني والألماني عايشين زي الماكينات .. والامريكي زي الدبابة
*
وبرغم ان عدد سكان فنلندا 5 مليون وشوية فكة .. لكن الدخل القومي لبلدهم أكبر من الدخل القومي لمصر أم 90 مليون بني ادم .. وعندهم شركات عملاقة في اكتر من مجال كان في مقدمتهم نوكيا – لحد ما ولاد ال## فستكوها – أما حاليا فهي من رواد صناعة السفن الضخمة عابرات المحيطات والصناعات الطبية والخدمات وعندها مئات الشركات العملاقة المصنفة في ترتيب فوربس لريادة الشركات .
*
طيب التعليم في فنلندا شكله إزاي ؟
*
بداية .. التعليم في فنلندا قانونا مجاني .. هيرد واحد يقولك ما في مصر مجاني .. هقوله الله يسهل عليك ياعم الحاج اتكل على الله وشوف انت رايح فين .. في فنلندا التعليم مجاني بمعنى كلمة مجاني .. رسوم المدرسة مجانا .. رسوم اتوبيس المدرسة مجانا .. ادوات المدرسة كاملة متكاملة من كتب وكراريس واقلام ومساطر وغيره مجانا .. في كل مدرسة فيه كانتيييين المدرسة اللي فيه طعمية سوخنة وبسمسم .. لأ مفيش طعمية .. بس فيها مطبخ ضخم في كل مدرسة .. متجهز من الابرة للصاروخ .. واقل واحد بيطبخ فيه بيبقى اخصائي تغذية .. واللي بيشرف على الطباخين معاه ماجستير .. والاكل مجاني طبعا .. آه وربنا المعبود .
*
بس كده الانبهارات .. لأ .. لسه
*
الهدف من التعليم في الاساس الراحة النفسية والبدنية للطالب وتربيته وتثقيفه قبل تعليمه .. فطبعا مفيش أي نوع من أنواع العقاب .. الا التعذير فقط .. وتقريبا تاريخيا محدش لجأ للعقاب في فنلندا ولا باللفظ حتى .. المفروض يجوا عندنا نديهم دورة .
*
وعشان الراحة النفسية تكمل .. المرحلة الأولى من التعليم عندهم 9 سنين زي ابتدائي واعدادي عندنا كده لكن عندهم مرحلة واحدة مقفولة.. المرحلة دي كلها مفيش فيها اختبارات ولا انننتحانات .. يا حلاوة امال بيعرفوا الطالب الكويس مش من الكويس ازاي .. هقولكم ان الهدف الاصلي والمتحقق بنسبة 99 % ان مفيش طالب هيفرق عن اخوه .. وهي دي الخلطة السحرية للتعليم الفنلندي .
*
بداية .. المدرس في فنلندا حتما ولابدا لازم يبقى معاه ماجستير للي هيدرس في المراحل الاولى زي الابتدائي والاعدادي .. وفي المرحلة الثانوية كتير من المدرسين معاهم دكتوراه ( بص أول ما تحس اني بسرح منك أو حاسس اني بمزع عليك اطلع ابحث في جوجل وارجع كمل ) مش ما جستير ودكتوراه في تخصصه وبس زي الرياضيات والعلوم والكيميا .. لأ ده بيكون باحث علوم تربوية ونفسية كمان .. ولازم خلال السنة بياخد دورات تأهيلية دورية لزيادة كفاءته .. طب ليه ده كله ؟
*
عشان المدرس بتاعك في الفصل هو اللي بيحط لك المنهج فعليا .. وبيحط كمان الاسس اللي هيشرح لك بيها المنهج ده وآليته ووسائله .. والوزارة والمدرسة مالهاش الا الخطوط العريضة اوي لمنهجية المرحلة .. يعني الاهداف العليا .. ضيف بقى ان المدرسة فاتحة الميزانية للمدرس يشوف ايه الادوات والتقنيات اللي عايزها عشان يوصل للطالب المعلومة باسهل الطرق وابسطها .. وكمان الطالب المعاق بيجيلوا مدرس مؤهل ومش بينفصل عن اصحابه وبيروح مدرسة خاصة .. يعني لو ابكم بيجيله مدرس بلغة الاشارة .
*
التقييم بقى .. بيقعد المدرس من دول يقيم الطالب بالاسلوب الوصفي للدرجات ومش الرقمي .. يعني بدل ما يكتب ( سسيفر من عشرة ) يكتب كده " هذا الطالب دون المستوى اللائق في ضرب الاعداد .. ولكنه جيد في القسمة.. وممتاز في الجمع والطرح " .. والتقييم ده سري .. بيترفع لادارة المدرسة .. وبتطلبه سنويا وزارة التعليم لتحسين الخطة التعليمية .
*
طيب المدرس من دول نبح حسه وطلعت عينه .. والطالب اللي قدامه بقف ولا بيفهم حاجة .. بيروح المدرس كاتب تحت في التوصيات انه محتاج مدرس إضافي فائق الخصوصية في الجزئية اللي الطالب مش فاهمها .. فإدارة المدرسة فورا بتوفر له المدرس اللي من النوع ده حسب التقييم الاداري الصارم للمدرسة نفسها عالمدرسين .. يعني عارفين مين احسن مدرس بيشرح الجزئية دي .. فهل فيه طالب بعد كده يختلف عن زميله .. يروح ينتحر احسن له .
*
اه الدروس الخصوصية ممنوعة منعا باتا .. والمدارس الخاصة تمثل نسبة 3 % من المدارس في فنلندا .. عدد 56 مدرسة بطول فنلندا وعرضها اللي مساحتها تالت اكبر مساحة في دول اوربا .. وفتح المدرسة الخاصة بيبقى صعوبته زي إجراءات فتح كباريه في بلد متدين .
*
الحصص في اليوم 4 ساعات فقط ، كل حصة واختها ما بينهم 75 دقيقة راحة .. آه .. مفيش واجبات منزلية .. بيعملوا الواجب في ال 75 دقيقة راحة دول وبيروحوا البيت يعيشوا حياتهم مع اهاليهم .. وفيه ساعتين كل اسبوع اسمهم مهارات .. بيعلموهم فيهم موسيقى ورياضة بأفضل الطرق .. مش بطريقة حصة الالعاب وروحوا يا ولاد لموا الورق من الحوش يروحوا العيال آزحين من عالسور وهاربانين .
*
عدد المعلمين بالنسبة للطلاب كالتالي .. معلم لكل 12 طالب في الحضانة والتمهيدي ، ومعلم لكل 15 طالب في الابتدائي ، ومعلم لكل 12 طالب في الثانوي .. والعدد ما تركزوش فيه اوي لأن في اليابان الفصل فيه 85 طالب .. فاحمدوا ربنا ان في مصر 55 بس .
*
اول امتحان في حياة الطالب الفنلندي بيبقى في نهاية المرحلة الثانوية .. طيب شكلها ازاي المرحلة الثانوي دي ؟ .. هل فيها ادبي علوم ولا رياضة .. الحكاية كلها خمس مواد بيدرسهم الطالب في الثانوي .. ومش بطريقة الحفظ واسئلة الانننتحانات بل بطريقة الفهم الكامل للمنهج ومفرداته .. ضيفوا على كده انه ممكن يزود على الاربع مواد دول كام مادة عشان يحسن من مستواه الكلي .. بميزة انه يختار الاسئلة كمان اللي عايز يجاوب عليها اخر السنة في المواد الجديدة دي .
*
والامتحان ممكن تدخله على دورين في السنة او في دور واحد أو ايا منهما .. وفيه طلاب عباقرة بقى بيدرسوا ثانوي عادي وثانوي مهني في روح واحدة .. وفيه طلاب بيوصل معاهم التحصيل الدراسي لعشر مواد مختلفين .
*
طيب بعد ده كله وجبت مجموع حلوا في الثانوي تدخل الكلية كده بالساهل .. لأ .. بتدخل برضه بتمتحن امتحان خاص لكل كلية على حدى .. واختبار صعب مش أي كلام بتثبت انت فيه انك مؤهل للكلية دي ولا تصلح لغيرها .. فما تدخلش كلية وتطلع منها كيس جوافة وتقول اصلي كنت عايز اطلع طيار واهلي ما صرفوش عليا .. وتروح تمارس الطيران على كراسي القهاوي من الدخان المتصاعد .
*
فيه جامعة تطبيقية للشرطة ، وكمان فيه الجامعة التطبيقية القومية للقوات المسلحة .. لكن محدش بيحب يدخلهم وبيفضلوا عليهم الطب والحقوق والتربية عشان دول اعلى رواتب في الدولة .. الهندسة بتيجي بعدهم .. إهيء . إهيء .
*
فيه اهتمام كبير بالتربية الأخلاقية من خلال كل الأنشطة ولجميع مراحل التعليم ، والتربية بتتاخد كعلم مستقل بذاته يعرف الطالب فيه الصح من الغلط .. وكمان فيه اهتمام كبير برضه بالدين والمعتقد .. بس انهو دين ؟؟ .. المدارس الفنلندية بتوفر حصص في التربية الدينية المسيحية حسب المذهبين الإنجيلي اللوثري ، والأرثوذكسي الروسي ، وكمان القوانين نصت ابتداءا من عام 2006 على توفير حصص تربية دينية حسب ستة مذاهب مسيحية أخرى ، علاوة على ( الدين الإسلامي ) ، وكذلك البوذية والبهائية والدين اليهودي ... كل 3 طلاب على ديانة معينة بيتصرف لهم مدرس خاص بالديانة دي .. فالطالب الفنلندي بيطلع عنده احترام كامل للمعتقدات الدينية اللي عليها أهله هو .
*
في سنة 1973 صدر قانون بيدي الحق للاطفال تحت سن الـ 6 سنين في وجود مكان لرعايتهم في منطقة سكنهم .. حضانة يعني .. سنة 1996 بقى فيه 217 الف حضانة في فنلندا بينطبق عليها ما ينطبق على التعليم بجميع مراحله من مميزات .
*
وفيه قانون تاني سنة 1990 للاطفال ما دون سن الـ 3 سنين اقر بحقهم هم كمان ان يبقى لهم مكان يرعاهم .. عالم رايقة والله .. فبقى فيه 70 الف مكان اسمه مركز الامهات البديلات .
*
انتقاء واختيار الكوادر التعليمية بيتم بعناية فائقة وله أولوية كبيرة في الدولة بداية من وزير التعليم لاصغر مربية في اصغر حضانة ... واتحاد المعلمين مش وسيلة ضغط على الدولة زي ما هو موجود في بعض الدول .. لأ .. ده لهم اجتماعات دورية مع وزارة التعليم بياخدوا ارائهم لصنع القرار .
*
90 % من المعلمين في فنلندا ستات مش رجالة .. برغم ان الاتنين بيتنافسوا موت على الوظيفة دي لانها تالت اعلى وظيفة دخلا بمبلغ سنوي يفوق الـ 30 الف دولار للمدرس .. لكن الستات بيستعدوا للتدريس من بدري اوي .. وجنب دراستهم بياخدوا دورات مشهورة هناك لتأهيل المعلمين .. أما الرجالة فبيعيشوا حياتهم .
*
نسبة الرسوب والسقوط في فنلندا تساوي 2% فقط .. ومخرجات التعليم من أجود ما يكون .. فالطفل الفنلندي خد أعلى درجة في القراءة التثقيفية و العلوم و الرياضيات في العالم .. حسب غالب الاحصاءات .
*
مصر ودخولها التجربة الفنلندية :
افرحوا ياولاد مصر هتبقى زي فنلندا في التعليم
في سنة 2014 وخاصة يوم الاتنين 17 فبراير راح الدكتور / محمود أبو النصر – وزير التعليم في حكومة محلب – وقابل سفيرة فنلندا في القاهرة الدكتورة / تولا يرجولا .. في اطار خطة مشتركة للاستفادة من التجربة الفنلندية وتطبيقها في مصر .. وأقر الدكتور الوزير ساعتها انها اعظم ما توصلت له دولة في التاريخ على مستوى النظام التعليمي .. وفرحت الدكتورة وزغرتت وقالت ومالوا يا عنيا .
*
قام بعدها بكام شهر الوزير منزل منهج جديد حط فيه شخصيات وطنية جديدة أمثال الاستاذ الفاضل / محمود بدر ورفاقه .. فاترفعت على الوزير قضية لتبنيه تدني المستوى التعليمي حسب أوراقها .. فكتر عليه الكلام واستلمته وسائل الاعلام المسموعة والمقروءة والمرئية واولهم شبكات التواصل الاجتماعي .. فنطروا الراجل في اول تغيير وزاري وجاله الخبر وهو قاعد في اجتماع وزاري وطلع الراجل ياعيني مش عارف يقول ايه .
*
وجه الدكتور / محب الرافعي .. الوزير اللي بعده وراح رافد كل اللي كانوا مع الوزير اللي قبله بقراراً وزاري رقم 126 بتاريخ 2 أبريل 2015 .. والناس اللي اترفدت دي كانوا بينفذوا خطة التطوير الفنلندية ... وياخسارة ماشوفناش من بعدهم فنلندا ولا حتى بورا بورا .
*
آخر حاجة الامارات عملت مدرستين على النظام الفنلندي في ابو ظبي .. لكن فشلوا فشل ذريع واتقفلوا .. لأن كانوا فاكرين ان المدرسة بس اللي هتطبق النظام وما بصوش للدولة بحالها واهدافها واستراتيجيتها .
*
#فنلندا
#التعليم
*
المراجع :
http://goo.gl/4F8GDu
https://goo.gl/NHwq2U
http://goo.gl/xi7noG
http://goo.gl/dlTLmz
http://goo.gl/SVPgvx
http://goo.gl/BZ9ZPl
http://goo.gl/pDvkbr
#منقول